Moço detido em Ames denuncia torturas

A TVG vulnera o direito à presunçom de inocência

08/01/2013

Segundo diferentes fontes, H.M.P., detido na noite do 7 de janeiro em Ames, teria denunciado durante o registo da sua vivenda ter sido objeto de ameaças e torturas. A informaçom emitida pola RTVG vulnerou o direito à presunçom de inocência do jovem e doutras persoas detidas com anterioridade, algumha delas em liberdade sem cargos.

O jovem independentista Hadriám Mosquera "Senlheiro" denunciou ter padecido torturas por parte dos polícias que o detivérom. Durante o registo da sua vivenda na paróquia amiense de Quistiláns, Senlheiro berrou várias vezes para que pudessem escuitá-lo os companheiros e amigos que protestavam no exterior da casa:"Torturárom-me no monte e estám-me ameaçando!", informa Galiza Livre.
As torturas teriam sido praticadas durante a faixa de tempo que transcorreu desde o momento da detençom (ao redor das 22:30 do dia 7 de xaneiro segundo fontes policiais) até a sua chegada ao domicílio familiar para o registo (ao redor das 11:00 da manhá desta terça feira), afirma Sermos Galiza.
Por outra parte, na informaçom emitida pola RTVG a propósito desta detençom, além de se citar o jovem H.M.P. como terrorista e se afirmar sem prova legal a sua pertença “á cúpula da organización terrorista Resistencia Galega”, também forom referidas outras persoas, às que é igualmente obrigado reconhecer o direito à presunçom de inocência por nom terem sido julgadas e mesmo estar algumha delas em liberdade sem cargos, como membros da citada organizaçom, num exercício de desprezo polos direitos das persoas sempre reprovável mas que, tratando-se de meios públicos como a TVG, deveria provocar a imediata intervençom dos responsáveis institucionais.